Temuai

free link to home study courses guide
Online home study courses guide.

Tuesday, February 19, 2008

Berita Nyelai di Kpg Semalatong ti Jarang Nyadi

Lemai 16 Feb 2008, asai ati agi ka belelak diri di rumah maya hari Minggu tau ka abis iya nadai pengawa nemuai ngabas kaban di menua Batu Gong. Tang nadai mukai-mukai, lemai nya datai di rumah lalu nemuai ngagai rumahdayak.com ka ngabas berita, lalu teringat ka berita Kpg Semalatong Simunjan. Nama deh nadai muai jam, lalu becherita serta ngeso (show) ka gambar kaban, Mr. Joseph Tawie benung nengkila ka tanda regang (cross) ba takang nyiur.

Heeemmm, nadai meri peluang sekeda ari bala budak lalu ngumbuk mai ngabas berita nya udah sembiang hari Minggu 17 Feb 2008. Nadai mega kaban ulih nyaut peminta nya laban ngasai ka Simpang Simunjan kira boleh tahan ga penyauh. Meda kaban nadai nyaut, nadai ga bala budak agi nyengala keran deka ke Kpg Semalatong. Dani pagi siti, endang baka selama, hari minggu, tak asai ke lembau amat angkat. Ke bendar, agi engkutung gali berimbai enggau budak ti biak sekali. Nadai ga di sadang indai budak ti udah dulu agi dani nyedia ka pemakai pagi sebedau nurun sembiang, datai ari dapur mai ngulu ka bala budak ke Kpg Semalatong laban deka amat-amat meda CROSS ba puchuk nyiur. Apuuuuuuu, nadai meh daya, puas kaban berunding antara ka antara enggai ngelebu ka bala budak.

Lama berunding mungkang nadai nyaut indai budak, enda berasai nyau meresu ga leka jaku nyaut "emmm auuuu meeeh." Ha ha ha ha anang saru kita bala kaban, ukai semua pekara kitai tau kering penemu lalu pia mega ukai semua pekara ga kitai tau lembut berubah runding.

Ba senentang tu tulang berasai lelak tang ingat ga ka Berita ti nyelai amat nyadi ba Kpg Semalatong. Tambah mega utai ti nyelai endang iya jarang amat nyadi, nya meh kebuah tau berubah runding.

Berita ti nyelai tu udah ngerembai di seluruh Sarawak kenyau ari 3 Feb 2008 suba, tang mayuh ga bala nadai ibuh serta engka ngira tau ka ngumbai pekara nya semampai nyadi. Enti enda salah ingat, kala ga ninga pekara ke sebaka kala nyadi di Palembang Indonesia serta Keningau Sabah.

Nyadi, baka selama mega nurun sembiang ke Gereja, ransing amat ga bala budak, bisi lah kebuah ke besai keno ko sida iya betelai ke diri, sengaja minta dinga apai budak kini nya!!!!

Pulai ari Gereja, lalu terus ke Kpg Semalatong Simunjan. Pejalai ari Kuching kira bisi ga 2 jam - 21/2 jam. Datai di Kpg Semalatong kira jam 3.30 lemai, maya ke datai dia, kereta, van tau ka bas bisi ga berupai dipeda betusun nisi jalai kira 1 KM. Lebih 2 jam begulu enggau mensia mayuh be ambi ka gambar ari semua sukut. Nyau pemuas chapuh ga bala betunjuk ka utai di peda diri, semina ari siti sukut ulih meda tanda REGANG. Nitih ka utai ti di peda indai budak ti duduk ba siti alai di rumah indai Niang Raymond Ak Duncan ke mati ngena payung terjun maya LIMA 2007 di Langkawi, keno ko iya, iya deka nunjuk ka puchuk nyiur ti alai orang meda regang, tang ia amat tekenyit, iya meda perenching REGANG lalu enda tepadah ka bala budak enggau apai budak ngachit ka kamera.

"Puji serta terima kasihTuhan ka semua pekara ke nyadi nya, arap ka kuasa NUAN nya di sadang muka mata serta negap ka runding bala sida Cherrysca, Cornellius, Christopher, Carlson serta Carlos terus nyembah, muji serta nemu beterima kasih ngagai NUAN"



Jalan semak Kpg Semalatong udah mayuh kereta betusun


Ba puchuk nyiur tu meh Tanda Regang bisi dipeda, pia mega ari batang nyiur image mua mensia ayan ba Camera enti ari sukut ti betul (keno ko bala enti "manah nasib")


Bala mayuh ti datai mega betunu ka dian, besampi minta berkat serta muji enggau beterima kasih ka Allah Taala laban ti ngayan ka utai ke nyelai nyadi ba sebatang nyiur


Engka tu meh sukut ke betul !!!!!


Tanda Regang tekalih sempat di gambar


Gambar ti kedua manah ari pemayuh gambar ti sempat di ambi


Niang Raymond Ak Duncan siko ari soldadu langit ti bebadi ba penusah maya PESTA LIMA di Langkawi ujung taun 2007 nyin kemari


Indai Niang Raymond Ak Duncan agi berupai siru ka anak iya ti udah nadai kira 2 bulan lalu, nitih ka berita, pun utai ke nyelai tu nyadi belabuh ari maya sida iya ngetas ulit ka niang Raymond kira dua minggu ti udah lalu


Mensia ti datai ari menua jauh enggau ke semak laban deka meda utai ti nyelai amat nyadi


Mensia mayuh nemuai meri basa ngagai sida indai Niang Raymond, pun nyiur lebih kurang senentang tiang putih ari alai ti ngambi gambar


Mensia mayuh ke datai endang nadai putus, bisi mega tudah ke sakit serta singkong taja pan pejalai ninggal ka kereta penyauh 2 km


Pemayuh mensia ke datai, ulih peda ari pemayuh kereta betusun sampai ka Kpg Isu ba jalai besai kira lebih 2 KM ari Kpg Semalatong



No comments:

Panggau Bujang Dara Endu Endun

Menua Apai Indai Aki Ini

Pupu Menua

Pupu Bansa